fbpx
Facebook Twitter Google Plus Linkedin Instagram YouTube

إيه أحسن جرافيك تابلت؟ طيب لو سألنا إيه أحسن موبايل؟ إيه أحسن لابتوب؟ أسئلة بتتكرر كتير بس مفيش إجابة نموذجية على الأسئلة دي وإجابتها بتعتمد على عوامل كتير وتفضيلات شخصية بتختلف من واحد للتاني. وقبل ما نبدأ في إزاي تختار أحسن جرافيك تابلت يناسبك لازم تعرف إن سوق الجرافيك تابلت دلوقتي عامل زي سوق الموبايلات واللابتوب في شركات كتير واختيارات كتير وانت اللي بتحدد أحسن ماركة وموديل مناسبين ليك.

خلينا نسأل الأسئلة المهمة الأول

إيه هو الجرافيك تابلت؟

الجرافيك تابلت ببساطة عبارة عن لوحة (Pad) بتتوصل بالكمبيوتر ومعاها قلم وبيمكنك إن تتحكم في الكمبيوتر زي الماوس بالظبط بس الفرق إنك ماسك قلم وبيحس بضغطة إيدك بالقلم على الباد. وده بيخليك تعمل حاجات مش هتعرف تعملها بالماوس زي الرسم الديجيتال والنحت الديجيتال والـ Retouching والمخطوطات وكمان لو بتعمل كورسات اونلاين هيسهل عليك الكتابة بإيدك أثناء الشرح.

إزاي تختار الجرافيك تابلت؟

أول حاجة … الاستخدام والـ Budget

قبل ماندخل على الجزء التقني لازم تسأل نفسك شوية أسئلة عشان تعرف استخدامك هيكون إيه وتحدد الـ Budget عشان تعرف إيه هيناسبك وإيه الإمكانيات اللي مش محتاجها وتعرف تجيب أكتر حاجة هتناسبك بأحسن سعر.

  • مجرد عايز تجرب ترسم ولا هواية وعايز تنميها؟
  • لسه بتدرس أو مبتدئ وعايز أعلي إمكانيات بس بسعر كويس؟
  • محترف وعايز أعلى إمكانيات؟

لو بتشتغل لازم تعرف إن ده Investment يعني أنا هدفع تمن الجرافك تابلت والشغل هيرجعلي الفلوس دي إمتي؟

جرافيك تابلت ولا شاشة رسم؟

بعد ماتحدد الاستخدام والـ Budget هتعرف تحدد تجيب جرافيك تابلت عادي ولا شاشة رسم. شاشة الرسم نفس فكرة الجرافيك تابلت بس بتكون شاشة بتتوصل بالكمبيوتر أو اللابتوب وبترسم عليها بشكل مباشر.

أسعار الجرافيك تابلت في مصر بتبدأ من 800 لحد 11 ألف جنيه وأسعار الشاشات بتبدأ من 6500 وتوصل لـ 60 ألف تقريباً (الأسعار وقت كتابة البوست ده وهنتكلم بالتفصيل عشان شاشات الرسم في بوست تاني)

بعد ماعرفت إستخدامك إيه وحددت الـ Budget وقررت إنك تجيب جرافيك تابلت نبتدي نقارن بين الموديلات تقنياً بحيث توصل لأعلي إمكانيات في حدود الـBudget اللي محددها وهنخليهم بالترتيب من حيث الأهمية والخصائص الأساسية

مساحة العمل الـ (Active Area)

الـ Active area هي المساحة اللي موجودة في الجرافيك تابلت اللي بتحس بالقلم وتنقل حركة القلم وحساسية الضغط للكمبيوتر. والمساحة دي بتعكس مساحة الشاشة يعني لو هتحرك القلم من أول الـ Active Area من اليمين للآخر في الشمال فالماوس هيتحرك في الشاشة من أول يمين الشاشة لآخرها في الشمال.

حساسية القلم (Pressure Sensitivity)

حساسية القلم من أهم مميزات الجرافيك تابلت اللي بتخليك تعرف تعمل حاجات مش هتقدر تعملها بالماوس. وهي إن القلم بيحس بضغط إيدك أثناء الرسم على الجرافيك تابلت وممكن تستخدم الميزة دي إنك تغير سُمك أو شفافية الخط وإنت بترسم. وتخصيص التحكم بالحساسية بيتخلف علي حسب البرنامج اللي بتستخدمه أو الأداة اللي بتستخدمها يعني مثلاً في الـ Photoshop ممكن تخلي في تدرج في الألوان علي حسب الضغط من الـ Color Dynamics في إعدادات الـ Brush وممكن تدمج أكتر من إعداد إنه يستخدم الـ Pen Pressure

الـ Pressure Sensitivity بتتقاس بالـ Levels وهي الحساسية بالضغط من أصغر نقطة (ملامسة القلم لسطح التابلت) لأكبر نقطة (أعلي مستوى ضغط) وكل ماعدد المستويات أكتر بيديك تحكم أكتر في سماكة الخط وسلاسة الخط من أرفع نقطة لأتخن نقطة

حساسية القلم في موديلات الجرافيك تابلت المتوفرة في السوق 1024، 2048، 4096 و8192.

الـ (Resolution (LPI

الجرافيك تابلت مفيهوش شاشة بس فيه Resolution خطوط بالطول والعرض هي اللي بتحدد مكان القلم على سطح الـ Active Area و وحدة قياسه هي الـ (LPI (Lines Per Inch أو خطوط في البوصة وطبعاً كل ما الـ Resolution أعلى هيديك دقة أعلى وسلاسة في الخط.

سرعة الاستجابة (RPS / PPS)

لما القلم بيتحرك على Active Area الجرافيك تابلت بيحس بالقلم وبيحدد مكانه ودرجة الضغط وبيبعتها للكمبيوتر وسرعة الإستجابة هي إن الجرافيك تابلت بيقدر يبعت المعلومات دي كام مرة في الثانية ولو بتشوف خصائص الجرافيك تابلت بالإنجلش هتلاقي شركات مسمياها (Reading Speed) ووحدتها (PPS (Point Per Second او Report Rate وحددتها (RPS (Report Per Second وهم الإتنين واحد مجرد اختلاف مسميات.

وكل مالسرعة بتزيد بتحس بسلاسة ومفيش أي تأخير بين حركة إيدك على الجرافيك تابلت والـ Cursor في الشاشة.

القلم

القلم هو أساس الجرافيك تابلت ولازم يكون مريح في استخدامه ومسكته ووزنه وفي الإغلب بتكون تفضيلات شخصية عشان كده لو ينفع تجرب الجرافيك تابلت قبل ماتختار عشان تعرف تصميم القلم حلو بالنسبالك ولا لا وفي نوعين للأقلام:

  • قلم ببطارية: في أنواع البطارية بتكون Built-in وطبعاً زي أي بطارية ليها عُمر افتراضي وبتبوظ وساعتها هتحتاج تشتري قلم جديد وفي أنواع البطارية AAA ودي أحسن عشان لو مش هتستخدم القلم أو البطارية باظت تغييرها.
  • قلم بيشتغل من غير بطارية: لغاية فترة قريبة كانت شركة Wacom بس اللي عندها النوع ده ودلوقتي Huion و XP-Pen كل موديلاتهم أقلام بتشتغل من غير بطارية.

والقلم بيكون ليه سن (Nib) وده اللي بيلامس سطح الجرافيك تابلت وبيتحرك عشان يحس بدرجة الضغط أثناء الرسم ومع كتر الإستخدام بيتاكل وبيكون مع الجرافيك تابلت سنون إضافية.

وفي أقلام بيكون فيها أستيكة في ضهر القلم ومش ميزة كبيرة بصراحة عشان ممكن تخصص واحد من الزرارين اللي في القلم إنه يعمل Switch بين الـ Brush والـ Eraser

زراير الاختصار (Express Keys)

في زراير بتكون جنب الـ Active Area بتقدر تخصصها زي مانت عايز وبتخصص كل زرار إنه يعمل Keyboard Shortcut او يشغل Function في البرنامج. وفي بعض موديلات بتكون زراير الإختصار بوظائف محددة ومينفعش تغيرها.

وفي الأغلب الواحد بيستخدم الكيبورد عشان يقدر يعمل بيها كل الاختصارات ومهما كان عدد زراير الإختصار اللي موجودة في الجرافيك تابلت مش هتغطي جميع الاختصارات اللي بتستخدمها.

خاصية الإمالة (Tilt)

الخاصية دي مهمة لو إنت شغال كاليجرافي أو بترسم خط عربي عشان التابلت بحيث بميلان القلم وبتقدر تخصصها في برامج الرسم ويديك نفس تأثير ميلان الفرشة أو قلم خط عربي في الحقيقة. بس لو بتشتغل Digital painting او أي إستخدام تاني ممكن متستخدمهاش أصلاً.

الضمان وقطع الغيار

أغلب شركات الجرافيك تابلت بتقدم ضمان سنة ضد عيوب الصناعة بس لازم تتأكد الأول إذا كان في ضمان ولا لا وخلي بالك إن القلم ممكن يبوظ لو وقع أو أخد خبطة جامدة شوية على سنه وده بيكون سوء استخدام وهتحتاج تشتري قلم جديد. فلازم قبل ماتختار جرافيك تابلت تكون متأكد إن القلم والسنون وقطع الغيار متوفرة.

الـ Multi-Touch

إن الجرافيك تابلت بيدعم اللمس بالإيد في الـ Active Area زي في الـ Touchpad بتاعت اللابتوب ممكن تعمل بيها Scroll, Zoom-in, Zoom-out, Rotate لغاية ما Huion عملتها بطريقة ذكية في موديل G10T إنها زي الـ Touchpad بالظبط منفصلة عن الـ Active Areaعشان لما بيكون الـ Touch في الـ Active Area بيضايق المتستخدمين لما إيدهم بتلمس التابلت أثناء الرسم.

الـ Wheel

دي بكرة بتكون في الجرافيك تابلت في الأغلب بتكون قابلة للتخصيص ممكن تخصصها إنك تعمل Scroll, Zoom-in, Zoom-out, Rotate.

الهدايا والإكسسوارات الإضافية

ممكن تشوف مع الجرافيك تابلت إيه الهدايا والإكسسوارات زي السنون الإضافية، حامل القلم، جوانتي، سكرين بروتيكتور، برامج مجانية ….

 

الخُلاصة

لازم تحدد استخدامك هيكون إيه وليه عايز تشتري جرافيك تابلت وده اللي هيسهل عليك تحديد الـ Budget وبعد كده تبتدي تدور على أكتر مميزات وتقارن بين الموديلات في حدود المبلغ اللي حددته. ومتنساش بعد ماتختار الموديل تشوف رفيوهات على الإنترنت وتشوف رأي الناس اللي جربته قبل ماتشتريه أو تيجي تجرب منتجات Huion و XP-Pen في ديجيتيزرز 😃

Leave a Reply

Your email address will not be published.Required fields are marked *